ТЕНДЕРИЙН БАТАЛГААНЫ ТУХАЙ
Төсөвт өртөг нь 100 сая төгрөгөөс дээш тендер шалгаруулалтад захиалагч Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 14 дүгээр зүйлийн 14.1 дэх хэсэгт зааснаар тендерийн баталгааг төсөвт өртгийн 0.5 хувиар тогтоож, тендер шалгаруулалтын баримт бичигт заадаг.
Энэ дагуу оролцогч тендерийн баталгааг банкны баталгаа, Монгол Улсын Засгийн газрын үнэт цаасны баталгаа, Монгол Улсын даатгагчаас гаргасан баталгааны аль нэг хэлбэрээр худалдан авах ажиллагааны цахим систем (www.tender.gov.mn) (цаашид “цахим систем” гэх)-ээр дамжуулан гаргуулж, тендер ирүүлж байна.
Сангийн сайдын 2023 оны А/252 дугаар тушаалын хавсралтаар батлагдсан “Худалдан авах ажиллагаанд баталгаа гаргах, орлого болгох журам”-ын 2.7-д “Хуулийн 28.1.3-т зааснаар тендерээс татгалзах шийдвэр хүлээн авсан оролцогч дараах нөхцөлийг хүлээн зөвшөөрснөөр өөрийн тендерт холбогдох тендерийн баталгааг цуцлуулах хүсэлтийг цахим системээр гаргаж болно. Үүнд: 2.7.1.захиалагчийн шийдвэрийг хүлээн зөвшөөрсөн ба хуулийн 59 дүгээр зүйлд зааснаар гомдол гаргахгүй байх; 2.7.2.баталгаа цуцлуулах хүсэлтийг цахим системээр гаргасан байх.” гэж, 4.10-т “Гадаад улсын банкны гаргасан тендерийн баталгааг энэ журмын 2.7-д заасан үндэслэлээр цуцлуулах бол хүсэлтийг захиалагчид бичгээр гаргана.” гэж тус тус заасны дагуу тендер шалгаруулалт зохион байгуулагдаж дууссан бол оролцогч тендерийн баталгааг чөлөөлүүлэх хүсэлтээ цахим системээр гаргаж, тендерийн баталгаагаа чөлөөлүүлдэг болохыг анхаарна уу.
ХУУЛЬ, ЭРХ ЗҮЙН ГАЗАР
ХУДАЛДАН АВАХ АЖИЛЛАГААНЫ БОДЛОГЫН ХЭЛТЭС
